तारकेश्वर नगरपालिकाले ल्यायो कोख देखी शोक सम्म कार्यक्रम, नगरवासीले पाउने छन अब यस्ता सुविधा

रबिन थपलिया । काठमाण्डौं । चैत्र १० । तारकेश्वर नगरपालिकाको १६ औं नगरसभा सम्पन्न भएको छ । नगरपालिकाको सभाहल धर्मस्थलीमा आज नगरप्रमुख कृष्ण हरि महर्जनको प्रमुख आतिथ्यतामा नगरसभा सम्पन्न भएको छ ।
नगरसभामा तारकेश्वर नगरपालिकाको चालु आर्थिक बर्षको ६ महिनाको समिक्षा गरिनुका साथै विभिन्न नीतिगत बिषयमा छलफल गरिएको छ । नगरसभाले तारकेश्वर नगरपालिकाले ल्याउन लागेको कोख देखि शोक सम्म कार्यक्रम समेत पारीत गरेको छ । जस अनुसार तारकेश्वर नगरबासीको परिवारमा जन्मीएको नवजात शिशुको स्याहारका लागि एक पटकका लागि रु ५ हजार पाउने छन् । त्यस्तै तारकेश्वर नगरपालिका भित्र बसोबास गदै आएका ८० बर्ष पुरा गर्नुभएका जेष्ठ नागरिक जस्ले तारकेश्वरबाटै जेष्ठ नागरिक भत्ता पाँउदै आउनु भएको छ उहाँहरुले केन्द्र सरकारले पाउने जेष्ठ नागरिक भत्ताको अलावा मासिक रुपमा थप रु २ हजार भत्ता पाउनुहुने छ । त्यस्तै तारकेश्वर नगरबासीहरुको परिवारका सदस्यको मृत्यु हुंदा प्रतिव्यक्ती रु १० हजार नगरपालीकाले राहत सहयोग गर्नेछ । तारकेश्वर नगरपालिकाले ल्याएको यस किसिमको सुविधा पाउनका लागि तारकेश्वर नगरपालिकामा स्थायी रुपमा बसोबास गदै आएको हुनुपर्नेछ ।

तारकेश्वर नगरसभाले अनुमोदन गरेको यस प्रकारको कार्यक्रम सम्भवत स्थानिय निकायमै पहिलो कार्यक्रम हो ।
नगरसभालाई सम्बोधन गर्नुहुंदै नगरप्रमुख कृष्ण हरि महर्जनले नगरपालिकाले कोख देखि शोक सम्म कार्यक्रम नगरवासीको हितका निम्ती ल्याएको बताँउदै यस कार्यक्रमले नगरवासीलाई थोरै भएपनि राहत मिल्ने विश्वास व्यक्त गर्नुभयो ।
नगरसभाको उदघाटन सत्रलाई सम्बोधन गर्नुहुंदै नगर उपप्रमुख सृजना बुर्लाकोटी अर्यालले विभिन्न कारणले गर्दा पुस मसान्तमा हुनुपर्ने नगरसभा चैत्रमा गर्नुपरेको बताँउदै नगरसभाले विभिन्न नीतिगत बिषयमा छलफल गरीने बताउनुभयो ।
कार्यक्रममा तारकेश्वर नगरपालिकाका प्रमुख प्रशासकीय अधिकृत इश्वर प्रसाद आचार्यले स्वागत मन्तव्य राख्दै स्थानीय सरकार सञ्चालन ऐन अनुसारनै नगरसभा गरिएको बताँउदै नगरसभाको सफलताको कामना गर्नुभएको थियो ।
नगर प्रवक्ता एवं वडा नं २ का अध्यक्ष राधाकृष्ण खड्गीले सञ्चालन गर्नुभएको कार्यक्रममा तारकेश्वर नगरपालिका वडा नं १ का अध्यक्ष बिदुर सापकोटा, वडा नं ३ का अध्यक्ष परशुराम अर्यालले १६ औं नगरसभाको सफलताको कामना गर्नुभएको थियो । नगरसभामा वडा सदस्य एवं नगर कार्यपालिका सदस्यहरुलाई नगद सहित सम्मान गरिएको थियो ।

xssxj