तारकेश्वरको प्रशासकीय भवन निर्माण सुरु

नुवाकोट, नुवाकोटको तारकेश्वर गाउँपालिकाको नयाँ भवनको निर्माण थालिएको छ । तारकेश्वर–१ रयलछापस्थित भवनको आइतबार सांसद अर्जुननरसिंह केसीले शिलान्यास गर्दै पालिकाको भवन निर्माणसँगै जनताको सेवा प्रवाहमा सहजता ल्याउनुपर्छ भन्नुभयो ।

“नयाँ भवन निर्माण हुँदैमा लक्ष्यअनुसार काममा सफलता प्राप्त गन सकिँदैन ।” उहाँले भन्नुभयो, “ जनताको सेवा प्रवाहमा जनप्रतिनिधि, कर्मचारी, राजनीतिक दलसहित सरोकार राख्ने सबै पक्षबीच कार्यगत एकता र लोकतन्त्रको अभ्यासमार्फत जनतालाई सेवा पु¥याउनुपर्छ ।” उहाँले पूरा हुन बाँकी रहेको विदुर नगरपालिका–३ बाट तारकेश्वर हुँदै धादिङ जोड्ने सडक सम्पन्न गर्न, तारुकाघाटमा नयाँ पक्कि पुल निर्माण गर्न, तारुकाको गोरु जुधाउने प्रतियोगितालाई खेल–पर्यटनको रुपमा विकास गर्नतर्फ प्राथमिकता दिने प्रतिबद्धता जनाउनुभयो ।

नयाँ निर्माण गरिने भवनले पूर्वाधार विकाससहित पालिकाभित्रका सडक, खानेपानी, शिक्षा, स्वास्थ्यलगायतमा सुधारतर्फ संयोजनक गर्न सकिने लक्ष्य राखिएको गाउँपालिकाको अध्यक्ष शिव अधिकारीको भनाइ छ । रु छ करोड ४२ लाखमा ठेक्का लगाइएको भवन सम्पन्न भएसँगै पालिकाको अध्यक्ष, उपाध्यक्ष, प्रमुख प्रशासकीय अधिकृतको कार्यकक्षसहित विभिन्न विषयगत शाखाको सेवा एकै भवनबाट प्रवाह गराउन सकिने प्रमुख प्रशासकीय अधिकृत राजु अधिकारीले जानकारी दिनुभयो ।

कार्यक्रममा भवन निर्माणको लागि आवश्यक छ रोपनी जग्गा निःशुल्क उपलब्ध गराउने ११ जग्गादातालाई दोसल्ला र र प्रशंसापत्रद्वारा सम्मान गरिएको थियो ।

दृष्टि फर्काइयो

सामुदायिक आँखा केन्द्र नुवाकोटले शल्यक्रिया गरेर एकसय ६० जना मोतियाबिन्दु भएका बिरामीको दृष्टि फर्काएको छ । तिलगङ्गा आँखा प्रतिष्ठानसँगको सहकार्यमा मोतियाबिन्दु भएका बिरामीको शल्यक्रियापश्चात् पुनः दृष्टि फर्काउन सफल भएको ताराबहादुर वाइवाले जानकारी दिनुभयो ।

उहाँको अनुसार जिल्लाको विभिन्न २३ स्थानमा गरेको निःशुल्क आँखा परीक्षण शिविर र केन्द्रमा जाँच गराउन आएका बिरामीबाट पहिचान भएकामध्ये एकसय ६० जना बिरामीको मोतियाबिन्दु गरेर दृष्टि फर्काइएको हो । तिलगङ्गा आँखा प्रतिष्ठान काठमाडौँका वरिष्ठ नेत्ररोग विशेषज्ञ डा होमबहादुर गुरुङसहित सातजना नेत्र चिकित्सक तथा स्वास्थ्यकर्मीको टोलीले शनिबार विभिन्न तीन चरणमा गरेको शल्यक्रियामार्फत ती बिरामीको आँखामा पुनः दृष्टि फर्काउन सफलता मिलेको हो ।

जनस्तरमा स्वास्थ्यप्रतिको सजगता वृद्धि हुँदै गए पनि नुवाकोटमा भने आँखाको हेरचाहमा चेतनाकोस्तर अझै धेरै बढाउन आवश्यक देखिएको वरिष्ठ नेत्ररोग विशेषज्ञ डा.गुरुङले सुझाव दिनुभयो । उहाँको अनुसार शिक्षित वर्गदेखि युवा र बालबालिकामा नै मोतियाबिन्दु भएर अन्तिम अवस्थामा पुगेको पाइएको छ । “नुवाकोटमा हरेक वर्ष आँखा परीक्षण सेवा पु¥याउँदै आए पनि लामो समयदेखि दुवै आँखाको दृष्टि गुमाएका दशजनाको यो पटक शल्यक्रिया गरेर दृष्टि फर्काइएको छ ।” उहाँले भन्नुभयो, “आँखा देख्न नसक्ने भएका आफैँ जाँच गराउन चासो नदिएको जानकारीमा आएकाले गाँउगाँउमा सञ्चालन गरिएको शिविरमार्फत मोतियाबिन्दु भएका बिरामीको खोजी गरिएको हो ।”

रोगको पहिचान भएर पनि विविध कारणले छुट भएका तथा केही स्थानमा शिविर सञ्चालन गर्न बाँकी रहेकालाई लक्षित गर्र्दै पुनः अर्को महिना शल्यक्रिया शिविर सञ्चालन गरिने जनाइएको छ ।