मनमैजु अजिमा जात्राको चौथो दिन आज मनमैजु युवा समुहको आयोजनामा मनमैजु मन्दीर परिसमा दिँउसो भव्य कन्सर्ट हुने

रबिन थपलिया । काठमाण्डौं । मनमैजु अजिमा जात्राको आज चौथो दिन मनमैजु युवा समुहको आयोजनामा दिँउसो तारकेश्वर नगरपालिका वडा नं ९ स्थीत मनमैजु मन्दीर परिसरमा ११ औं बृहत सांस्कृतिक तथा कन्सर्ट कार्यक्रम हुंदैछ ।
मनमैजु जात्राको अवसरमा हुन गइरहेको सांस्कृतिक तथा कन्सर्ट कार्यक्रममा ख्याती प्राप्त राष्ट्रिय र स्थानीय कलाकारहरुको प्रस्तुती रहेको मनमैजु युवा समुहका अध्यक्ष हिरा महर्जनले बताउनुभयो । मनमैजु मन्दीर परिसरमा हुन गइरहेको कन्सर्ट कार्यक्रममा प्रवेश निशुल्क रहेको अध्यक्ष महर्जनले बताउनुभयो । दिउँसो १२ बजे पछि हुने कन्सर्टको लागि सम्पुर्ण तयारी पुरा भएको मनमैजु युवा समुहले जनाएको छ ।
कन्सर्टमा विशेष प्रस्तुती अनुप रास्थाको रहने छ भने संघर्ष व्याण्ड र द आस्तत्र व्याण्डको विशेष प्रस्तुती हुने छ । कार्यक्रममा निस्मा देशराज, रोजमान महर्जन, नेवारी र्यापर मिनुस लगायत दर्जनौं कलाकारहरुको प्रस्तुती रहनेछ । कार्यक्रमको होस्ट वालकलाकारद्धय कृष्मा महर्जन र सुसान्की महर्जन सहित सुनिल महर्जनले गर्ने छन् ।
कन्सर्ट कार्यक्रमलाई तारकेश्वर नगरपालिका तथा वडा न ९ र १० सहित बिभिन्न संघ, संस्था र दाताहरुको सहयोग रहेको आयोजकहरुले बताएका छन् । कार्यक्रममा तारकेश्वर नगरपालिकाका प्रमुख कृष्ण हरि महर्जन सहित नगरपालिकाका जनप्रतिनिधिहरु, व्यवसायी, सामाजिक अभियन्ताहरु, राजनीतिक दलका प्रतिनिधिहरु लगायतलाई आमन्त्रण गरिएको समुहका अध्यक्ष महर्जनले बताउनुभयो ।
कार्यक्रममा यस पटक तारकेश्वरका बिभिन्न विद्यालयका वालबालिकाहरुको समेत प्रस्तुती रहने छ । कार्यक्रममा सहभागी भएर मनोरञ्जन लिनका निम्ती मनमैजु युवा समुहले सबैलाई अनुरोध समेत गरेको छ । कन्सर्ट कार्यक्रमको मनमैजु युवा समाजको फेसबुक पेज तथा सगरमाथा पोष्ट डट कमको अफिसियल पेजबाट प्रत्यक्ष हेर्न सकिने छ ।
मनमैजु युवा समुह तारकेश्वरमा सामाजिक र परोपकारी कार्यमा अग्रणी संस्थाको रुपमा पहिचान बनाउन सफल भएको छ । संस्थाले भुकम्प र कोरना महामारीको समयमा समेत बिभिन्न परोपकारी कामहरु गरेको थियो ।