अमेरिकी राष्ट्रपति डोनाल्ड ट्रम्पले ग्रिनल्यान्डसम्बन्धी आफ्नो कडा अडान नाटकीय रूपमा परिवर्तन गरेपछि युरोपेली देशहरूले राहतको सास फेरेका छन्। स्विट्जरल्यान्डको डाभोसमा जारी विश्व आर्थिक फोरम (डब्लूईएफ) मा सहभागी युरोपेली नेताहरूले ट्रम्पको पछिल्लो अभिव्यक्तिलाई सकारात्मक संकेतका रूपमा लिएका छन्।
यसअघि ट्रम्पले आठ युरोपेली देशमाथि शुल्क लगाउने धम्की दिएका थिए। तर पछिल्लो धारणा परिवर्तन गर्दै उनले ग्रिनल्यान्ड कब्जा गर्न बल प्रयोग नगर्ने र आर्कटिक क्षेत्रको सुरक्षाका लागि नाटोसँग सहकार्य गर्दै नयाँ ढाँचा तयार गर्ने बताएका छन्। यद्यपि, ग्रिनल्यान्डसम्बन्धी यो नयाँ समझदारीको वास्तविक अर्थ के हो भन्ने विषयमा अझै धेरै प्रश्नहरू अनुत्तरित नै रहेका छन्।यसैबीच, डेनमार्ककी प्रधानमन्त्री मेट्टे फ्रेडरिक्सनले आफ्नो देशको सार्वभौमसत्तामाथि कुनै पनि प्रकारको वार्ता सम्भव नभएको स्पष्ट पारेकी छन्। अमेरिकी पक्षले ग्रिनल्यान्डमा बल प्रयोग नगर्ने र आर्कटिक सुरक्षाका लागि नाटोसँग सहकार्य गर्ने बताएको सन्दर्भमा आफूलाई ‘यस्तो कुनै प्रस्ताव नरहेको’ जानकारी दिइएको उनको भनाइ छ।
एक वक्तव्यमा प्रधानमन्त्री फ्रेडरिक्सनले आर्कटिक क्षेत्रको सुरक्षा सम्पूर्ण नाटोको साझा विषय भएको उल्लेख गर्दै यस विषयमा अमेरिकी राष्ट्रपति र नाटो महासचिव मार्क रुटबीच छलफल हुनु स्वाभाविक भएको बताइन्। उनले डाभोसमा राष्ट्रपति ट्रम्पसँग भेटघाट अघि र पछि समेत महासचिव रुटसँग निरन्तर सम्पर्कमा रहेको जानकारी दिइन्।
डाभोसकै एक कार्यक्रममा अमेरिकी विशेष दूत स्टिभ विटकफले राष्ट्रपति ट्रम्पले युक्रेनका लागि ‘ट्यारिफ–फ्री जोन’ अर्थात् शुल्कमुक्त क्षेत्रको अवधारणा विचार गरिरहेको खुलासा गरेका छन्। उनका अनुसार यसले युद्धग्रस्त युक्रेनमा उद्योग र अर्थतन्त्रको पुनर्निर्माणमा ठूलो सहयोग पुर्याउन सक्छ।‘राष्ट्रपतिले युक्रेनका लागि शुल्कमुक्त क्षेत्रको कुरा गरेका छन्, जुन मेरो विचारमा खेल परिवर्तन गर्ने खालको हुनेछ,’ विटकफले ‘युक्रेन ब्रेकफास्ट’ नामक साइडलाइन कार्यक्रममा भने।
रुस–युक्रेन युद्ध अन्त्य गर्न शान्ति सम्झौताका लागि पहल गरिरहेको अमेरिकी प्रशासनको तर्फबाट विटकफले मस्को जानुअघि यी टिप्पणीहरू गरेका हुन्। उनले अबुधाबी क्षेत्रतर्फ पनि भ्रमण गर्ने योजना रहेको बताउँदै त्यहाँ सैन्य–देखि–सैन्य संवाद र समृद्धिसम्बन्धी विषयमा कार्य समूहस्तरका छलफल हुने जानकारी दिए।
यता, डाभोसमा उपस्थित युरोपेली प्रतिनिधिहरूले ट्रम्पको पछिल्लो अभिव्यक्तिले तत्कालका लागि तनाव कम भएको प्रतिक्रिया दिएका छन्। विश्व आर्थिक फोरमका विभिन्न कार्यक्रमहरूमा युक्रेन युद्ध र आर्कटिक सुरक्षाबारे नाटो महासचिव रुटसँग हुने छलफललाई पनि विशेष महत्वका साथ हेरिएको छ। ग्रिनल्यान्डसम्बन्धी ट्रम्पको अडान फेरिएसँगै युरोपमा तत्कालको संकट टरेको अनुभूति भए पनि यसको दीर्घकालीन प्रभावबारे अझै स्पष्टता आउन बाँकी रहेको विश्लेषकहरूको भनाइ छ।
प्रतिक्रिया दिनुहोस्