२०२६ को म्युनिख सुरक्षा रिपोर्टले दोस्रो विश्वयुद्धपछिको अन्तर्राष्ट्रिय व्यवस्था योजनाबद्ध रूपमा कमजोर हुँदै गएको गम्भीर चेतावनी दिएको छ। ६२ औँ म्युनिख सुरक्षा सम्मेलनको पूर्वसन्ध्यामा सार्वजनिक गरिएको यस रिपोर्टले विशेषगरी अमेरिकी विदेश नीतिमा आएको आमूल परिवर्तनलाई औँल्याएको छ। रिपोर्टका अनुसार, हालको अमेरिकी प्रशासनले परम्परागत अन्तर्राष्ट्रिय प्रणालीका महत्वपूर्ण स्तम्भहरूलाई बेवास्ता गर्दै आएको छ।
विशेष रूपमा, रिपोर्टले विश्व स्वास्थ्य सङ्गठन र जलवायु परिवर्तनसम्बन्धी पेरिस सम्झौताबाट अमेरिकाको बाहिरिनलाई उदाहरणका रूपमा प्रस्तुत गरेको छ। यसले युरोपेली साझेदार राष्ट्रहरूसँगको सम्बन्धमा गहिरो दरार सिर्जना गरेको बताइएको छ। युरोपेली नेता र कूटनीतिज्ञहरूले अमेरिकालाई अब “अपरिचित” राष्ट्रका रूपमा हेर्न थालेको रिपोर्टमा उल्लेख छ।
त्यस्तै, अमेरिकाले आफूले नै निर्माण गरेको विश्व व्यापार नियमहरूको उल्लङ्घन गरेको आरोप पनि रिपोर्टमा समावेश छ। सन् २०२५ को अप्रिलमा राष्ट्रपति ट्रम्पले ‘मुक्ति दिवस’ घोषणा गरेपछि अमेरिकाले करिब सबै देशका उत्पादनमा उच्च भन्सार शुल्क लगाएको छ। यसका कारण औसत भन्सार दर १५ प्रतिशत पुगेको छ, जुन १९३० को दशकपछिको सबैभन्दा उच्च दर हो र अघिल्लो वर्षको तुलनामा करिब आठ गुणा बढी हो।
म्युनिख सुरक्षा सम्मेलनका अध्यक्ष वोल्फगाङ इसिन्गरले भने, “युरोपेली सुरक्षा र ट्रान्सएटलान्टिक साझेदारीका विषयमा यति धेरै मौलिक प्रश्नहरू एकैसाथ कहिल्यै उठेका थिएनन्। यसले समग्र क्षेत्रीय सुरक्षा र विश्वव्यापी स्थायित्वका लागि गम्भीर चुनौती प्रस्तुत गरेको छ।”
रिपोर्टले अन्तर्राष्ट्रिय समुदायलाई चेतावनी दिएको छ कि यदि प्रमुख राष्ट्रहरूले बहुपक्षीय सहयोग र नियम-आधारित प्रणालीलाई पुनः समर्थन नगरे, विश्वव्यापी सुरक्षा र स्थायित्व संकटमा पर्न सक्छ।
प्रतिक्रिया दिनुहोस्